|
2.November 2009
A mis chli Ängeli Suena
Liebi Suena, mir häd kämpft, ghofft, und doch verlore. So sehr mir Dir jetzt Dini Ruhe gönned, üses Härz isch voller Truur, Dich liede z'gseh und nid hälfe chöne, das isch für üs de gröschti Schmärz gsy. Wo Du chrank worde bisch aafangs Johr, hät üs das wie en Schlag troffe, mir händs nid chöne glaube, das nur es paar Mönet, nachdem mir üses Omi dur en Hirntumor verlore händ, dass au Du di glich Diagnose häsch müese ha.
Es isch dänn es Uf und Ab gsy mit üsne Gfühl, d’Operation hät üs Hoffnig gmacht. Jo, mir händ immer dra glaubt, dass Du wieder ganz gsund wirsch. Aber dänn, nach es paar Wuche sind die Verglichswärt cho us Dütschland und es hät gheisse, dä Tumor sei doch bösartig und inoperabel. Mä hät üs grohte, e Bestrahlig und Chemotherapie azfange, aber mir händ Dir wiiteri belaschtendi Spitalufenthält wölle erspare und händ üs nach intensive Überlegige defür entschlosse, en andere Wäg z'goh.
Mit Dim Mami und Dinere chline Schwöschter Enaya häsch Du chöne für es paar Wuche zum Herr Janssen uf Holland. Er hät scho grosse Heilerfolg chöne erziele bi andere Chind mit ähnliche Chrankete. Es isch für Dich sicher e wunderbare Zyt gsy, au wenn mir als Familie halt lang trennt gsy sind und mir nur händ chöne telefoniere oder mit em Läpptop und de Webcäm händ chöne Kontakt ha, bis uf die paar mol, wo d’Arria und ich Eu händ dörfe go bsueche. Aber es isch Dir so gute gange, dass Du gar kei Medikament häsch müese ne. De Tumor hät Dir denn au kei Schmerze gmacht, Du häsch chöne spile, häsch chöne go Sache aaluege, häsch anderi Chinde kenneglärnt, Du häsch eifach e unbeschwärti Zyt gha.
Aber leider isch dä Tumor dänn plötzlich wieder stärker worde und mir händ müese zrugg, hei uf Islike. Do bisch Du die letschte paar Wuche dänn gsy, mir alli, s'Mami, d'Arria, d'Enaya, dä Opi und ich, mir händ die Zyt ganz intensiv mit Dir chöne verbringe. Au dini Gschpändli und vill Lüt, wo Dich kännt händ, händ Dich chöne go bsueche. Au de Pfarrer hät immer Freud gha, wenn er mit Dir hät dörfe lache. Langsam bisch Du aber immer schwächer worde, häsch versuecht z'kämpfe bis zum Schluss: Es isch schwär gsy und hät u-mega weh tue, Dich so lide z'gse. Du bisch sone tapferi gsy.
Dänn, am letschte Samschtig händ mir müese akzeptiere, dass Du z'schwach worde bisch, kei Chraft meh ufbringsch um wiiter z'kämpfe. Am Sunntig isch no de Geburtstag gsy vo Dim Mami, fire häm mir nid möge, es hät üs viill z'fescht weh tue, Dich so liide z'gseh. Am Obig bisch Du zwüsched em Mami und mir im Bett gläge, mir händ Dini Händli ghalte, es letscht mol Dini Wärmi gschpürt. Dänn sind mir alli 3 iigschlofe, wie mehr das scho viel gmacht händ. Aber am andere Morge isch es so andersch gsy als susch, bisch Du nöme mit üs ufgwachet.
Nur 7 Johr häsch Du törfe bi üs si, aber mir sind dankbar für jedi Stund, wo mir Dich händ törfe ha. Dis lache, Dini Heiterkeit cha üs niemer meh näh. Immer wänn mir vo Dir verzelled, lüchted Sunnestrahle i üses Härz. Üsi Härze händ Dich umfange, so als wärsch Du wiiter bi üs. Jo liebi Suena, mis Engeli, mir alli wärded Dich nie im Läbe vergässe und Dich immer i üsne Härze träge.
25. oktober 2009
d 18 uf d 19 oktober isch wohl euse schlimschti tag gsi im lebe, ghofft und banget und glich hets innerhalb vonere stund umgschlage und d suena het sich uf dä weg i d unendlichkeit gmacht.........ich bring die bilder nüme usem chopf vo dä letschte nacht...... es isch eifach unfassbar schlimm gsi, es chind so z gseh.... d suena het niä chönä ha wenn mensche trurig sind und brüelet, und genau dä ziitpunkt wo dä thomy und ich schnäll ipfuset sind het sie sich usgsuecht und het eus für immer verloh........nachdem d arzt ihre s morphium ge het sind mir zu d suena aneglege und hend sie i d mitte zwüschet eus ghebet, irgendwenn am morge am 5 sind mir igschlofe- nu für en moment- und i dere ziit isch sie für immer vo eus gange.....jetzt isch es den scho e wuche sit her und es wird vo tag zu tag schlimmer, d suena fehlt eus unendlich a allne egge und end (sorry i schriib eifach usem herze) und mir wüsset dass es vo tag zu tag na schlimmer wird........au d beerdigung isch a eus vobi we en film aber a das wo mir eus möget errinere isch wunderschön gsi....d lieder und au predigt vom pfarrer...es isch eifach sehr en persönliche gottesdienst gsi...bewundernswert sind au d abschiedswort vom thomy gsi für euses ängeli suena...ich het das nie gschaft...mir hoffät das mir das tagebuech witerhin chönd aktualisiere.......villicht sogar mitere gallerie vo fotene vo d suena........
i wet mich au i dem sinn mal bi allne bedanke für alli blueme, engel, chärtli und eifach die liebe und nette wort und gedanke.........ohni eu alli würet mir das nid schaffe........schön dass ihr alli für eus da sind........
thomy und renate
|
9. Oktober 2009
mir versuechet s tagebuech vo d suena täglich z ergänze aber mängmal gohts eifach nid da bi eus jede tag sehr vill los isch mit chinderspitex, physio, familie und natürlich au kollege und fründe wo d suena chömet go bsueche. Sie freut sich au jede tag wenn d pfarrer christian hermann sie chunnt go bsueche, er isch ganz en tolle mensch und tuet ihre und eus u guet.
d suena gohts au hüt recht guet, sie isch we immer sehr vill am lache und das git eus unheimlich vill chraft. Hüt hend mir na e ganz e netti frau becho vo d stiftig pallkids wo eus unterstützt, sie macht entweder mit d schwöschtere vo d suena öpis oder befasst sich mit d suena damit mir jetzt i de ferieziit öpis chönntet unterneh mit d arria und d enaya.
aber d suena het hüt nanig welle elleige bliibe mit ihre somit sind mir alli dehei bliibe, i denke bim 2. mal gohts den scho.
|
|
| |
|
| 8. Oktober 2009 |
|
D`Suena hät hüt en mega super Tag gha, da sie ja geschter Ihren heiss ersehntä Film vo dä Hannah Montana übercho hät. Sie hät dä Film hüt mit dä grossä Schwöschter dä Arria, sicher 3 mal dörfä luegä.
D`Suena wird über d`Magesonde ernärt, ihren Zustand isch stabil, dank dä tägliche fernbehandlig mit em Ewald Jannsen vo Holland und dä tägliche Therapie durch dä Karl.
|
| |
|
| 22. August 2009 |
|
 Suenas 7 Geburtstag, woran niemand mehr geglaubt hat ausser uns. S`Mami hät am Morgä d Suena scho mega hübsch agleit gha und sie sich hüt mega ihren Geburtstag gfreut. Dän isch üsi familie, fründä und Nachbarschaft verbicho zum mit dä Suena dä 7. Geburtstag z`firä. Dä eint oder ander hät ä wunderschöni Überaschig mitbracht und d`Suena hät sich mega drüber gfreut. |
|
